هنعيش دلوقتي مع قصيدة من قصائد عمنا أحمد فؤاد نجم (الفاجومي)
يا شعبي حبيبي
يا شعبي حبيبي ياروحي يا بيبي ياحاطك في جيبي يا ابن الحلال
يا شعبي ياشاطر يا جابر خواطر وساكن مقابر وصابر وعال
يا واكل سمومك وبايع هدومك يا حامل همومك وشايل جبال
يا شعبي اللي ناي وسارح وهايم وفي الفقر عايم وحاله ده حال
أحبك محشش مفرفش مطنش ودايخ مدروخ وآخر انسطال
أحبك مكبر دماغك مخدر ممشي امورك كده باتكال
وأحب اللي ينصب وأحب اللي ينهب ويسرق تلال
وأحب اللي قافل عيونه مغفل وأحب البهيم وأحب البغال
وأحب اللي راضي وأحب اللي فاضي وأحب اللي عايز يربي العيال
وأحب الل بايس وأحب اللي بائس وأحب اللي محبط وشايف محال
وأحبك تسافروتبعد تهاجر وتبعت فلوسك دولار أو ريال
وأحبك تطبل تههل تهبل عشان ماتش كورة وفيلم ومقال
وأحبك تعضد تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكرتخطط تقرر تشغلي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعملي روحك مفرد رجال
ساعتها هجيبك لا يمكن أسيبك وراح تبقى عبرة وتصبح مثال
هابهدل جنابك وأزل اللي جابكوهيكون عذابك ده فق الاحتمال
وأمرمط ساعتك وأهزأ سيادتك وأخلي كرامتك في حالة هزال
وتلبس قضية وتصبح رزية وباقي حياتك تعيش في انعزال
هتقبل هاحبك .. هترفض هلبك هتطلع هتنزل هجيبلك جمال
الاشتراك في:
تعليقات الرسالة (Atom)
ليست هناك تعليقات:
إرسال تعليق